У лік нацыянальных страваў уваходзяць “гювеч” - тушанае мяса з бульбаю і гароднінаю, “каварма” - страва з мяса з грыбамі, лукам і бульбаю, “мусака” - рагу з сечанага мяса, бульбы і яйкаў, “плакія” - тушаная з гароднінаю рыба, “кебабчета” або “кебабче” - смажаныя мясныя каўбаскі, яечня з ёгуртам “мекіцас”, атбіўная печань ягня з рысам і яйкам - “дроб-сарма”, тушаная ялавічына “чомлек”, асарці “мешана скара” і мноства іншых выдатных страваў.

У балгарскай кухні шырока ўжываюцца гародніна ў свежым і марынаваным выглядзе, з іх рыхтуюць разнастайныя салаты, агароднінныя стравы і гарніры. У першую чаргу, гэта знакаміты “шопскі салат” з рэзаных памідораў, агуркоў, балгарскага перцу і рэпчатага лука, пакрыты зверху цёртым авечым сырам. Таксама варта паспрабаваць фаршаваныя грыбамі або брынзаю памідоры, грыбны кактэйль, тушанае мяса з гароднінаю і лукам (або толькі гародніна з лукам) - “яхнія”, фаршаванае вінаграднае лісце “сармі”, страва з баклажанаў “імам баялда”, страва з запечанага сыра і шпінату - “баніца”, а таксама “піперкі палнены” (”чушкі”) - начынены мясным фаршам або рысам перац.

Характэрна, што балгары ядуць шмат хлеба, кісламалочных прадуктаў, брынзы і авечага сыра (”кашкавал”). Вельмі папулярныя найсмачныя густыя супы - “чорба” з маладое бараніны, морквы, бульбы, памідораў і лука, суп-пюрэ з фрыкадэлькамі - “топчета супу”, суп з свінога страўніка - “шкембе чорба”, суп з сачавіцы - “ляшча чорба”, арыгінальны суп з ягняціны - “агнешка курбан чорба”, а таксама знакаміты халодны суп “таратор” з кіслага малака, агуркоў, цёртага грэцкага арэха і лука.

Завяршае трапезу кубак духмянай кавы, да якога абавязкова прапануюць “белае варэнне”, блінцы з мёдам, арэхі або пахлаву, а таксама абавязковы куфель выдатнага балгарскага віна. Хвацкія чырвоныя віны вырабляюць па ўсёй Балгарыі. Найболей знакамітыя “Памід”, “Гымза”, “Мавруд”, “Мелнік”, “Мерла”, “Цяленне” “Тракія” і “Кабернэ Савіньон”.

Славяцца белыя “мушкаты” з Карлоао і Сунгурлара, белыя віны “Хан Крум Трамінер”, “Галатеа”, “Дімят”, “Евксіновград”, “Кадарка”, “Магарешка мляко”, “Рылскі манастір”, “Рыслінг” і “Тамьянка”. Балгарыя з'яўляецца і радзімаю “ракіі” - слівовага брэндзі (якую, зрэшты, вырабляюць і з вінаграда, абрыкосаў, чарэшні і іншай садавіны). Найболей папулярнымі гатункамі ракіі з'яўляюцца “Загорка”, “Астіка”, “Шуменска”, “Бісерна”, “Мускатова” і “Врачанска”. Ужываецца і “масціка”, лепшым гатункам якое лічыцца “Перыстера”. Найболей папулярнымі (і дужымі!) гатункамі піва з'яўляюцца “Шуменска піва” (выпускаецца з 1882 г.), “Асціка” і “Загорка”.